நீங்கள் தேடியது "வாலிபர் தப்பி ஓட்டம்"

சென்னை:

சென்னை கோட்டூர்புரம் பகுதியில் போலீசார் நேற்று இரவு வாகன சோதனையில் ஈடுபட்டிருந்தனர்.

சப்-இன்ஸ்பெக்டர் ராமு, போலீஸ்காரர் சக்கிவேல், ஊர்க்காவல் படை வீரர் அண்ணாசாமி ஆகியோர் கோட்டூர்புரம் லாக் தெருவில் போலீஸ் ஜீப்பில் ரோந்து சென்று கொண்டிருந்தனர். அப்போது அந்த வழியாக சந்தேகத்துக்கிடமாக வாலிபர் ஒருவர் மோட்டார் சைக்கிளில் சென்று கொண்டிருந்தார்.

போலீசாரை பார்த்ததும் மோட்டார் சைக்கிளை வாலிபர் வேகமாக ஓட்டினார். இதனால் போலீசாரின் சந்தேகம் வலுத்தது. அவர்கள் மோட்டார் சைக்கிளை விரட்டி சென்றனர். அப்போது அந்த வாலிபர் தான் வைத்திருந்த பையை தூக்கி வீசினார். பின்னர் அங்கிருந்து மோட்டார் சைக்கிளில் மின்னல் வேகத்தில் தப்பிச் சென்று விட்டார்.

போலீசார் விரைந்து சென்று பையை எடுத்து பார்த்தனர். அதில் கட்டுக்கட்டாக பணம் இருந்தது.

இதனால் அதிர்ச்சி அடைந்த போலீசார் பணப்பையை பத்திரமாக போலீஸ் நிலையத்துக்கு எடுத்துச் சென்றனர். பின்னர் பணத்தை எண்ணி பார்த்தனர். அதில் ரூ.1 கோடியே 56 லட்சம் பணம் இருந்தது. இந்த பணம் போலீஸ் நிலையத்தில் பாதுகாப்பாக வைக்கப்பட்டுள்ளது. பணத்தை எடுத்துச் சென்ற வாலிபர் யார்? அவர் எங்கிருந்து யாருக்காக ரூ.1½ கோடியை கொண்டு சென்றார்? என்பது தெரியவில்லை.

ரூ.1½ கோடி பணமும் ஹவாலா பணமாக இருக்கலாம் என்று போலீசார் சந்தேகிக்கிறார்கள். இது தொடர்பாக விசாரணை தீவிரப்படுத்தப்பட்டுள்ளது. பணத்தை போட்டு விட்டு தப்பிச் சென்ற நபரை பிடிக்க தேடுதல் வேட்டை தீவிரப்படுத்தப்பட்டுள்ளது.

அந்த பகுதியில் பொறுத்தப்பட்டுள்ள கண்காணிப்பு கேமராக்களில் பணத்தை எடுத்துச் சென்ற வாலிபரின் உருவம் பதிவாகியுள்ளதா? என்பது பற்றி போலீசார் ஆய்வு செய்து வருகிறார்கள். கோட்டூர்புரம் லாக் தெருவில் நேற்று இரவு நடமாடியவர்கள் யார்-யார்? என்பதை செல்போன் தொடர்புகள் மூலம் கண்டு பிடித்து விசாரணை நடத்தவும் போலீசார் திட்டமிட்டுள்ளனர்.

சென்னையில் ஹவாலா பணபரிமாற்றத்தில் ஈடுபடும் குற்றவாளிகள் பற்றிய தகவல்களையும் போலீசார் திரட்டியுள்ளனர். இப்படி பல கோணங்களில் மர்ம வாலிபரை பிடிக்க விசாரணை முடுக்கிவிடப்பட்டுள்ளது.

பூதலூர்:

தஞ்சை மாவட்டம் பூதலூர் அருகே புதுக்குடி வடக்கு தெருவை சேர்ந்தவர் ஆறுமுகசாமி (வயது 32). இவரது மனைவி ஷீலா (24). இவர்களுக்கு ரித்தீஷ் (4) , பிரதீஷ் (3 மாதம்) என்ற 2 குழந்தைகள் உள்ளனர்.

ஆறுமுகசாமி திருச்சி திருவெறும்பூரில் உள்ள ஒரு தனியார் நிதி நிறுவனத்தில் ஊழியராக வேலை பார்த்து வருகிறார்.

நேற்று இரவு வேலை முடிந்து வழக்கம் போல் வீடு திரும்பினார். அப்போது இரவில் கணவன்- மனைவி இடையே தகராறு ஏற்பட்டதாக கூறப் படுகிறது.

இந்த நிலையில் இன்று வீட்டில் இருந்த ரித்தீஷ் நீண்டநேரமாக அழுது கொண்டிருந்தான். இதனால் குழந்தை சத்தம் கேட்டு அக்கம் பக்கத்தினர் வீட்டுக்கு சென்று பார்த்தனர்.

அப்போது வீட்டுக்குள் ஷீலா கழுத்து அறுபட்ட நிலையில் பிணமாக கிடந்தார். அவரது உடல் அருகே 3 மாத குழந்தை பிரதீசும் பிணமாக கிடந்தான்.

தாயும், குழந்தையும் அருகருகே கொலை செய்யப்பட்டு கிடப்பதை கண்டு அவர்கள் அதிர்ச்சி அடைந்தனர். மேலும் ஆறுமுகச்சாமியும் வீட்டில் இருந்து வெளியே சென்று தலைமறைவாகி விட்டார்.

இதைதொடர்ந்து தாய்- குழந்தை கொலை சம்பவம் பற்றி செங்கிப்பட்டி போலீசாருக்கு பொதுமக்கள் தகவல் கொடுத்தனர். அதன் பேரில் பாபநாசம் போலீஸ் டி.எஸ்.பி. செல்வராஜ் (பொறுப்பு), பூதலூர் இன்ஸ்பெக்டர் கரிகால சோழன், சப்-இன்ஸ்பெக்டர்கள் ராஜேந்திரன், கங்காதரன் மற்றும் போலீசார் விரைந்து வந்து விசாரணை நடத்தினர். மேலும் தாய்-குழந்தை உடலை கைப்பற்றி பிரேத பரிசோதனைக்காக தஞ்சாவூர் மருத்துவக்கல்லூரி மருத்துவமனைக்கு அனுப்பி வைத்தனர்.

கொலையுண்ட ஷீலாவின் சொந்த ஊர் புதுக்கோட்டை மாவட்டம் கந்தர்வர்க்கோட்டை அருகே உள்ள சோளகம்பட்டி கிராமம் ஆகும். கடந்த 5 ஆண்டுகளுக்கு முன்பு ஆறுமுகச்சாமிக்கும், ஷீலாவுக்கும் திருமணம் நடந்தது. இருவருமே பட்டதாரிகள் ஆவர்.

இந்த நிலையில் மனைவி ஷீலாவை கழுத்தை அறுத்தும், 3 மாத குழந்தையை கழுத்தை நெரித்தும் ஆறுமுகச்சாமி கொலை செய்ததை ஏன்? என்று தெரியவில்லை. தற்போது தலைமறைவாக இருக்கும் ஆறுமுகச்சாமியை பிடித்து விசாரித்தால் மட்டுமே கொலைக்காக காரணம் தெரிய வரும் என்று போலீசார் தெரிவித்தனர்.

மனைவி-குழந்தையை கணவனே கொடூரமாக கொலை செய்த சம்பவம் பூதலூர் பகுதியில் பெரும் பரபரப்பை ஏற்படுத்தியுள்ளது.